మూడునామాల మెరిసేటి మొనగాడా

మూడునామాల మెరిసేటి మొనగాడా !
మూడుమూర్తులకు మూలమైనట్టి వాడా ! (పల్లవి)

1. భక్తి మద్యము త్రాగు ఉన్మత్తుడా! - ధర్మాల తన్నేటి శ్రీ దత్తుడా!
గోపికలతో గూడు శ్రీ కృష్ణుడా ! - నీ లీలలె శ్రీ వెంకటేశుడా !

2. పద్మకై ప్రతి రాత్రి దిగివచ్చేవు - భక్తి ప్రభావమదియని చాటేవు
స్వార్ధములఁ దీర్చుకొన గిరినెక్కేరు - వారికి శిలా మూర్తి కనిపించేను

3. భక్తులకు చేతనగ, మాటలాడేవు - స్వార్ధులకు శిలగానె గోచరించేవు
పాషాణ విగ్రహమె స్వార్ధ జీవులకు - కరుణా రసార్ణవము భక్త జీవులకు

4. కోరికలు దీర్చుకొనవచ్చు లుబ్ధులకు - మాటలాడిన గాని మౌనమిచ్చేవు
మాటలాడగ నీవె స్వయముగా కొండ - దిగి వత్తువా ! స్వార్ధ రహిత భక్తులకు

5. పద్మావతీ ప్రేమ ఎంత గాఢమో - తెలియంగ తరమౌనె దేవతలకైన
కాలినడకనె వచ్చు కొండరాళ్ళలో - ప్రతి రాత్రి పాదముల బొబ్బలెక్కగా

6. లుబ్ధులకు పగలంత రాతి పాదములు - కఠినంబులైయుండు మార్పులేకయె
అర్ధరాత్రులవియే మారు పద్మకై - చరణ పద్మములుగా కోమలంబులై

Download this bhajan sung by Shri Dattaswami here.

వెంకటేశ్వరుడు - ఎంగిలి చేసిన

వెంకటేశ్వరుడు - ఎంగిలి చేసిన
తిరుపతి లడ్డును - తిందాము రారె (పల్లవి)

1. భక్తియె చక్కెర - ఙ్ఞానమె బూందియు - శ్రద్ధయె ఏలా ఫలముల పలుకులు
ప్రపత్తి తలపులె ఎండిన ద్రాక్షలు - శరణాగతియే పచ్చకప్పురము

2. పద్మావతియే స్వయముగ చేసిన - పెద్ద పెద్దవవి లడ్డులు చూడరె
మధ్య మధ్యలో సత్సంగములను - చర్చల వడలను నంచుక తినుచును

3. భక్తి రసామృత మాధుర్యమయము - ఎన్ని తిన్ననూ రోగము కానిది
స్వామి ప్రేమలను లడ్డుల తినవే - ఆ లడ్డులన్ని వ్యాపారములే

4. ఙ్ఞానవహ్నితో వండిన వంటలు - ఎప్పటి కప్పుడు వేడి వేడివవి
భక్తి గీతములె జీడిపప్పులే - రుచికరములవియె తినవే పద్మా

5. అంతరార్ధమును తెలియని వారలు - శాశ్వత నష్టము పొందెదరవనిని
దిగి దిగి వచ్చిన అవతారములే - తిరుపతి లడ్డులు ప్రసాదములవియె

Download this bhajan sung by Shri Dattaswami here.

బ్రహ్మోత్సవాల ఊరేగు పరబ్రహ్మమును చూడగ రారండి

బ్రహ్మోత్సవాల ఊరేగు పరబ్రహ్మమును చూడగ రారండి
చతుర్దశ భువన వాసులారా ! (పల్లవి)

1. ఏడు కొండలవె ఎంతో ఎత్తుగ - నీల గగనమును చుంబించునెపుడు
నీలమేఘరుచి సంభ్రమ మతులై - నీలవర్ణుడగు స్వామియనిఁ దలచి

2. కనక తోరణములుజ్జ్వల దీపము - లుత్తుంగ రధము భక్తార్ణవమదె
అడుగో రధమున గరుడుడు మూపున - అడుగో అడుగో అరవిందాక్షుడు

3. రాజాధిరాజ పదవులున్నను - కోట్ల కోట్లకును పడగ లెత్తినను
పగ్గముల బట్టి రధమును లాగుచు - స్వామి బండి పశు పదవికి పరుగులు

4. అదృశ్య రూపులు ఇంద్రాది సురలె - రధమును లాగుచు స్వామి సేవలకు
తోసుకతోసుక పరుగులెత్తుదురు - ఈ నర చీమలు స్వామి ముందెంత?

5. సప్తమహర్షులు కనక కమలముల - పదములనుంచుచు అర్చించుచుండ
అర్చకులారా ! ఓ నరులారా ! - మీరెంత తెలిసి వినయమునుండుడు

6. కసరబోకుడీ భక్తుల నెవరో - ప్రహ్లాదుడో మరి తిన్నడో ఉండును
స్వామి మనమునకు ఖేదము కలుగును - తనకన్న భక్తులెక్కువ స్వామికి

Download this bhajan sung by Shri Dattaswami here.

వెంకట రమణా !

వెంకట రమణా ! నీ సొమ్ములెంత
నీ కళ్యాణ గుణ విలువల ముందు (పల్లవి)

1. నీ కారుణ్యమునకు కనకాభరణాలు - ఎన్నియైన తుల తూగునా ! దేవదేవ !
నీ వాత్సల్యమునకు వరహాల పతకాలు - లక్షలైనను సరియౌనె ? వాసుదేవ !

2. నీ అందమునకు ముందు రూకలును -బిందెలైనను బిందు మాత్రమెస్వామి !
నీ త్యాగమునకెదురు తక్కెడలో నిలుచునె-ధనమెంత యైనను పద్మా హృదయకామి!

3. నీ జ్ఞానమునకు ముందు నిలువగలవా ? - వజ్ర కిరీటాలు వజ్రాభరణాలు !
నీ సౌందర్యకళకు సరివచ్చునె దేవ ! - నీ భూషణ ఖచిత రత్నాల కాంతులు !

4. నీ ప్రేమసుధకు సమ ఉజ్జియగునే - పంచామృత చందన గంధరసధారలు !
నీ ఔదార్యమునకు తలవంచును - హేమాభరణములు మణి మాణిక్యములు !

5. నీ సౌజన్యము ముందు వెలవెల పోయెడి - బంగారు హారాలు బంగారు కడియాలు!
నీ శాంతికి ముందు ఓడి చింతించుచున్నవి-చింతాకు పతకాలు చిత్తు చిత్తయినవిట !

6. నీ కళ్యాణ గుణములు నిత్యములైయుండు -ఈ సొమ్ములన్నియు నాశమొందునుదేవ!
షోడశ కళలైన షోడశ గుణపూర్ణ ! - పూర్ణ చంద్ర ప్రకటిత శ్రీ దత్తా త్రేయ దేవ !

Download this bhajan sung by Shri Dattaswami here.

పట్టె నామాల పరమాత్ముడా

పట్టె నామాల పరమాత్ముడా
కళ్యాణ తిలక కమలాక్షిరో ! (పల్లవి)

1. తెలవారవచ్చె తెల్లనగునభము - తెల్ల కాగితము రీతిచూపట్టె
మీమీద కవిత నేవ్రాయ ప్రకృతి - సిద్ధముగఁజేయు విధముగ తోచు
సంధ్య రేఖలవె రాగరంజితము - లక్షర పంక్తులు వ్రాయబడె వరుస
అనురాగ కలిత గీతల కవితల - పాడవలె వీటినే రాగముతో

2. నానా పక్షులు నానారాగము - లందున పాడగ కలకలమదియే
సంగీత విదుషి పద్మావతిసతి - లేవనిమ్ము హరి ! రాగాల దిద్ద
గోవిందనామ నిత్య జప పద్మ - పద్మాయని హరి నిత్యము జపించు
విడువదు పద్మయు విడువడు హరియును - పైన దర్శనము గోవింద నేడు
ఎత్తుక పోవగ వచ్చియున్నారు - హనుమయు గరుడుడు బయటకు వచ్చిన
బయటకె రానీయదు పద్మ నేడు - బాహు బంధమున బంధించెహరిని

Download this bhajan sung by Shri Dattaswami here.

ఏడు కొండలనున్న ఏకైక దేవరా

ఏడు కొండలనున్న ఏకైక దేవరా !
ఏడేడు లోకాల నేలేటి రాయడా ! (పల్లవి)

1. నీ సాటి ఎవరు? నీరజలోచన! - నీ ధాటి ఎవరికున్నది ? నిత్యుడ !
నీపోటి ఎవరు? పరమబ్రహ్మమ ! - నీ చేటి ఎవరు ఆ పద్మ తప్ప !
ఐహికమ్ములమ్ము పెను దుకాణంబు - తిరుపతి యనగా తలచుచున్నారు
భక్తి సుధలనుచితంబుగా నిచ్చు - ధర్మ సత్రమిది తెలియకున్నారు !

2. సతుల తగవుతో శిలయగుట కల్ల - మంగ పద్మలకు కలహమే లేదు
మంగ పద్మయను ఒక్కరె అనఘ - మా స్వార్ధముగని రాయివైనావు
లంచాలనిచ్చి పనుల జేసుకొను - ప్రభుత్వ కార్యాలయముగ తిరుమల
మారిపోయెనిల ! నిశ్చేష్టుడగుచు - రాతి బొమ్మగా మారిపోతివా

3. అన్నమయ్యకును పద్మావతికిని - అందాలరూప మందించినావు
లంచగొండులగు భక్తులకు నీవు - కొండబండగా చూపట్టినావు
ప్రేమయు కరుణయు బ్రహ్మానందము - గడ్డకట్టెనిట పురుషరూపమా !
నీ అందమెవరు చెప్పగలరిలను- పాలమ్ముకొను ఆ గోపి తప్ప

Download this bhajan sung by Shri Dattaswami here.

సర్వ జీవులకు మొగుడైన మొనగాడా

సర్వ జీవులకు మొగుడైన మొనగాడా !
పదనారు వేల రాజ కన్యలకు ప్రియుడైన వాడా ! (పల్లవి)

శ్రీ వేంకటేశుడా ! నీ అందాలు ఎన్నెన్నో - చిందులేసెడి స్మరశత సుందరాంగుడా !
నీ కమలనయనాల సొగసులవె నర్తించు- పద్మావతీ హృదయ రంగమున యువతులవలె

బ్రహ్మోత్సవంబుల గరుడ వాహన ! నీవు - తిరుమల వీధులలో ఊరేగింపులలో
లలితంబుగా నూగుచు వయ్యారమొప్పుగ - అలరారు చుండేవు అరవిందలోచన !

నీ అందమె అందమురా నీ కులుకె కులుకురా -నీ పలుకె పలుకురా నీ తళుకె తళుకురా
మోహిని రూపధరుడ ! నవమోహనాకారా - నీ కమల కన్నులు చాలురా నాచూపు నిలుపంగ

అలివేలు మంగయును అలుక బెట్టును వీడి - అంతఃపురమున నిలిచి ఆలోకించునదిగో
గరుడ హనుమదాదుల నధిరోహించి నీవు - ఊరేగింపులలో వెడలు వయ్యారమును

బ్రహ్మరధము పైన బ్రహ్మోత్సవాలలో - బ్రహ్మాండవాసులగ బ్రహ్మాదులె నిరీక్షించ
నీ శయ్యయగు శేషుని నేరుగఁజూచేవు - వాలు చూపుల పద్మను కన్నుగీటేవుగా !

పట్టెనామాలతో పట్టు పీతాంబరమ్ముతో - మెరయు వజ్రాభరణాల జనసాగరమ్ములో
గాంభీర్యముగ నూరేగింపుచుండ - నిను జూచు భక్తులే నిత్యముక్తులు బ్రహ్మానందమదియె

Download this bhajan sung by Shri Dattaswami here

జయ జయ సప్త గిరీశ్వర! వేంకటనాయక ! దత్తాత్రేయ విభో !

1. ఫాలమునందున పట్టెపు నామములజ్జ్వలమైన త్రిశూలముగా
నామమునందున ఈశ్వర శబ్దము నాభి కమలమున బ్రహ్మయదే
వెరసి త్రిమూర్తులుగా నెలకొంటివి దేదీప్యమాన వైభవమై
జయ జయ సప్త గిరీశ్వర! వేంకటనాయక ! దత్తాత్రేయ విభో !

2. తమ తమ పనులకు లంచములిచ్చెడి భక్త వేశ్యలకు మౌనముతో
వజ్ర కిరీటము కనకాభరణములే కనిపించును నీ శిలలో
స్వార్ధ విముక్తులు భక్తులు చూతురు నీ కరుణారస బాష్పములన్
జయ జయ సప్త గిరీశ్వర! వేంకటనాయక ! దత్తాత్రేయ విభో !

3. అన్నమయ్య యిట పాడుచు నెక్కుచు మెట్టు మెట్టునకు చూచెనుగా
నవనవ సుందర రూపములెత్తుచు నెదురుగ కులికెడి నీ కళలన్
స్వార్ధ పూరితులు భక్తులు చూతురు కొండల బండల వృక్షములన్
జయ జయ సప్త గిరీశ్వర! వేంకటనాయక ! దత్తాత్రేయ విభో !

4. దిగి దిగి వత్తువు పద్మావతికై కొండరాళ్ళబడి గాయములై
పదములు నిజముగ కమలములయ్యెను రక్త సిక్తములు ఎర్రనివై
పద్మా ప్రణయము స్వార్ధ రహితమది నిర్మల గంగా వాహినియే
జయ జయ సప్త గిరీశ్వర! వేంకటనాయక ! దత్తాత్రేయ విభో !

5. హే మధుసూదన ! హేమురమర్దన ! హే కంసాంతక ! దాశరధే !
హే పీతాంబర ! హే తులసీసర ! హే మురళీధర ! శాంతినిధే !
మంగా వల్లభ ! గోదా మోహన ! నాంచారీప్రియ ! వెంకపతే !
హే శ్రుతి శాస్త్ర పురాణ సమన్వయ తత్త్వ సుబోధక దత్త గురో !

శ్రీ నరసింహ స్తుతి

1. అహో ! పింగళాక్షాగ్ని జాజ్వల్యమానా స్ఫురన్నాసనిశ్వాస సంహారరంహా
జటాపావకజ్వాలికా దీప్యమానా నమో నారసింహా విధూతాస్మదంహా

2. మహాక్రోధ వహ్నిచ్ఛటా విస్ఫులింగా నఖైర్దంష్ట్రికాభి ర్మహాఘోరరూపా
మహాగర్జనోగ్ర ధ్వనిధ్వస్తలోకా నమో నారసింహా విధూతాస్మదంహా

3. హిరణ్యాసుర ప్రాణ నైవేద్యలోలా రమాదైవత ప్రార్ధనా క్షేప కోపా
మహాభక్త బాలస్తుతి ప్రీయమాణా నమో నారసింహా విధూతాస్మదంహా

4. పురోమంగళాద్రీశమధ్యోజ్జ్వలాస్యా ప్రపన్నార్తి సద్యోవిమోక్ష ప్రదాతా
పరాభక్తి మార్గైకసం సేవ్యమానా నమో నారసింహా విధూతాస్మదంహా

Download this bhajan sung by Shri Dattaswami here

శ్రీ రామ కీర్తన

భజ భజ భాస్కరకుల సంజాతం
రామం శార్ఙ్గ ధనుర్ధర మేతమ్‌ (పల్లవి)

నిష్కామ భక్తి తపసాక్రీతం జ్ఞానాగ్ని వచన తేజశ్శాతమ్‌
ధర్మస్ధాపనలోక విభాతం సాక్షాన్నారాయణ మాయాతమ్‌

వాల్మీకి సుకవి కవితాగీతం స్వాదర్శ కధా గంగాపూతమ్‌
హనుమద్భుజ పీఠాసననీతం కేవలసాయక దశముఖ పాతమ్‌

పట్టభిషేక సుర సమవేతం వామాంకాసన సీతాప్రీతమ్‌
స్వచరిత గాయక కుశలవతాతం సకల చరాచర సూత్ర ప్రోతమ్‌

Download this bhajan sung by Shri Dattaswami here

కృష్ణ కీర్తన

శ్రీ దత్త భగవానుని షోడశ కళలతో అవతరించిన పరబ్రహ్మమే శ్రీ కృష్ణ పరబ్రహ్మము. అందులకే శ్రీ కృష్ణ భగవానుల అవతారమును పరిపూర్ణ తమావతారముగా వర్ణించుట జరిగినది.

1. ఋషివరాణాం మానసాలోలహంసాయ - మకుటాన్తమయూర పింఛావతంసాయ
ఏకప్రహారేణ విధ్వస్తకంసాయ - శ్రీ వేణుగోపాలకృష్ణాయ వన్దనమ్‌

2. వ్యత్యస్త విన్యస్త పాదారవిన్దాయ - మధురామృతాసార మురళీనినాదాయ
జాజ్వల్యమానాంశు పీతామ్బరాఙ్గాయ - శ్రీ వేణుగోపాలకృష్ణాయ వన్దనమ్‌

3. ఆకర్ణ తేజస్వి మీనాయతాక్షాయ - ప్రత్యూష పద్మాంశు నేత్రచ్ఛద యుగాయ
కమల లోచన కాంతి సమ్మోహనాస్త్రాయ - శ్రీ వేణుగోపాలకృష్ణాయ వన్దనమ్‌

4. ఆముక్త ముక్తావళీ జాల హారాయ - గోపీ దధి క్షీర నవనీతచోరాయ
బృందావనే వల్లవీ బృంద జారాయ - శ్రీ వేణుగోపాలకృష్ణాయ వన్దనమ్‌

5. సాయంతనే ధేను బృన్దాను గమనాయ - మార్గమధ్యే వల్లవీ కుంచితాక్షాయ
రాధాజగన్మోహినీ మోహనాయ - శ్రీ వేణుగోపాలకృష్ణాయ వన్దనమ్‌

6. కాళీయ ఫణి ఫణా సంక్షోభ నటనాయ - కాంచీక్వణ త్కింకిణీ నిస్వనాయ
గోవర్ధనోద్ధరణ లీలాస్మితాస్యాయ - శ్రీ వేణుగోపాలకృష్ణాయ వన్దనమ్‌

7. కస్తూరికాతిలక రేఖాలలాటాయ - తులసీ స్రగామోద వక్షః కవాటాయ
పార్ధాయ విశ్వరూపాలోలఖేటాయ - శ్రీ వేణుగోపాలకృష్ణాయ వన్దనమ్‌

8. శ్రీ రుక్మిణీ సత్యభామా సమేతాయ - గోపీ సహస్రేణ సంవేష్టితాఙ్గాయ
రాసే రసే సర్వదా సద్వినోదాయ - శ్రీ వేణుగోపాలకృష్ణాయ వన్దనమ్‌

Download this bhajan sung by Shri Dattaswami here

శ్రీదత్త హనుమదీశ్వరం

(శ్రీ దత్త భగవానుని ధ్యైర్యగుణమే హనుమంతులవారు. హనుమంతులవారు అనేక సాహసోపేతమైన కృత్యములు చేయటం - ఎన్నెన్నో సంకటాల నుండి భక్తులను రక్షించటం - జగత్తులో అందరికి తెల్సిన సత్యమే కదా! శ్రీ దత్త హనుమానులను స్వామి ఈ విధంగా కీర్తించారు).

శ్రీదత్త హనుమదీశ్వరం ధ్యాయామి రఘుపతి ప్రియమ్‌
ప్రజ్ఞాని భక్త యోగినం పావనిం పరమ పావనమ్‌ (పల్లవి)

1. అన్నా ! అన్నా ! ఓ హనుమన్నా ! పాపములెన్నో చేసితినన్నా !
దయతో నీవె క్షమించకున్న దిక్కులేదు నా సాధన సున్న !

2. ఇంద్రియ నిగ్రహమసలే లేదు నీకు తమ్ముడని చెప్పుట సిగ్గు !
నిష్కామ సేవ కలలో మాట అదియే గద నిత్యము నీబాట

3. పరమవావనా ! పవన కుమారా ! రుద్రావతారా ! నిర్జిత మారా !
వీరాధివీర ! వేదార్ధసారా ! ఖల సంహారా! గిరి సంచారా !

Download this bhajan sung by Shri Dattaswami here

సంకట మోచన హనుమత్ స్త్రోత్రము

సాగర లంఘన సంకుల వానర కులమవ లోక్య నిజస్తుతి లోలం

జలధర చుంబి మహా కృతి రేక పద క్రమలంఘిత జల నిధి రేవమ్‌

రఘుపతి మానందయసిచ సీతా కుశల నివేదన హృతఘన శోకం

కోనహివేత్తి కపీశ జగత్యతి సంకట మోచన నామ తవేదమ్

(సముద్రమును దాటు విషయములో వ్యాకులమై తనను స్తుతించుటలో మునిగి యున్న వానర కులమును చూచి జలధరములను చుంబించు మహాకారముతో కేవలము ఒకఅడుగుతో జలధిని లంఘించి, సీత క్షేమముగా ఉన్నదను వార్తను నివేదించి ఘనమైన శోకమును పోగొట్టి రఘుపతిని ఆనందింపచేయుచున్నవు ఓ కపీశ్వరా! మహాసంకట మోచనుడవను పేరు నీకున్నదని ఈ జగత్తులో ఎవరికి తెలియదు).

అహికుల బంధన మోహిత దాశరధీ ద్వయ మాలోక్య మనో వికలం
ఖగపతి మానయసిస్మ వికుంఠా పురగతమస్త్ర విమోచనదక్షమ్‌
పునరాయోధన బలినం వహసిచ భుజయుగరూఢం సోదరయుగ్మం
కోనహివేత్తి కపీశ జగత్యతి సంకట మోచన నామ తవేదమ్

(నాగముల పాశముతో మూర్ఛిల్లి నిశ్చేష్టులైన రామలక్ష్మణులను చూచి ఆ నాగాస్త్రమునుండి మోచనము కలిగించుటలో సమర్ధుడైన గరుత్మంతుని వైకుంఠమునుండి తీసుకువచ్చి నాగపాశ విమోచనము గావించి మరల యుద్ధమునకు సన్నద్ధులైన రామలక్ష్మణుల సోదరుల జంటను, నీ భుజస్కందములపైమోయుచున్నావు ఓ కపీశ్వరా!...)

మూర్ఛిత లక్ష్మణ భోధసమర్ధ మహౌషధిసంజివిలతాం నేతుం
ఉత్పతసి క్షణ మద్రిముపానయసిస్మ కరేణ తమివ సుమగుచ్ఛమ్‌
ఉత్థిత లక్ష్మణ కరయుగ వందన మాలింగసి విహసంశ్చ సరాగం
కోనహివేత్తి కపీశ జగత్యతి సంకట మోచన నామ తవేదమ్

(యుద్ధములో మూర్ఛిల్లిన లక్ష్మణుని మూర్ఛను పోగొట్టుటకు సమర్ధమైన మహౌషధి యగు సంజీవి లతను తీసుకొని వచ్చుటకు ఒక్క క్షణకాలములో ఎగిరి ఆ సంజీవి పర్వతమునే పూలగుత్తివలె చేతిలో ధరించి తీసుకొని వచ్చినావు. సంజీవి లతతో మూర్ఛ నుండి లేచిన లక్ష్మణుడు రెండు చేతులెత్తి చేసిన నమస్కారమును పెద్దగా నవ్వుచూ ప్రేమతో గ్రహించినావు ఓ కపీశ్వరా!...)

శతముఖ రావణ హృత రఘునాయక మంబా బలిపశుముపగత మోహం
పునరానయసిచ తమసురముపగత జీవం విధాయపాతళేశమ్‌
రాఘవశరమూర్ధ్వముఖంకృత్వా నమ్రం హరసిచ యుధి దశకంఠం
కోనహివేత్తి కపీశ జగత్యతి సంకట మోచన నామ తవేదమ్

(కాళికాదేవికి బలినిచ్చుటకై శతముఖ రావణుడు మాయచే మోహింపచేసి రఘునాయకుని పాతాళమునకు తీసుకొనిపోగా, ఆ పాతాళ రాజగు శతముఖ రావణుడగు రాక్షసుని విగతజీవుని చేసి శ్రీరాముని మరల కొనితెచ్చినావు. రావణునితో రాముడు యుద్ధము చేయునప్పుడు యుద్ధనీతి ననుసరించి ఊర్ధ్వముఖముగా బాణమును వేయగా నీతండ్రియగు వాయుదేవుని అర్ధించి ఆ బాణము అధోముఖముగా చేసి రావణుని నాభిలోయున్న అమృత కలశమును ఛేదించి సంహరించినావు ఓ కపీశ్వరా! ...)

శృంఖలయా నియత శనైశ్చరమపి మోచయసిస్మ శుచ స్సహసాతం
కోమే సంకట ఇహ హనుమన్గురు సోదర మామవ దయయా దీనమ్‌
కధమపి యోగ్యో నాహమకారణ కరుణైవ తవహి కారణమేకం
కోనహివేత్తి కపీశ జగత్యతి సంకట మోచన నామ తవేదమ్

(సర్వసంకట కారకుడగు శనైశ్చరుడే లంకానగరమున ఇనుప సంకెళ్ళతో బంధించబడి దుఃఖసంకటములో పడగా వెంటనే ఆ శనైశ్చరుని బంధవిముక్తిని గావించితివి. అట్టి నీకు ఇచ్చట నా సంకటమొక లెక్కయా? ఓ హనుమంతా! అన్నా! గురుదేవా! దయతో దీనుడైన నన్ను రక్షించుము. ఏ విధముగా చూచినను నాకు యోగ్యత లేదు. కాని అకారణమైన నీకు గల కరుణయే ఒకే ఒక కారణముగా నన్ను రక్షించుము ఓ కపీశ్వరా!...)

వానరసింహ ఖగేశ వరాహ హయానన పంచానన శివరూపం
వైష్ణవ తిలకం భవిష్య జగతాం ధాతారంత్వాం నమామిదేవమ్‌
త్రిమూర్తి తత్వం సాక్షాద్దత్తం పరమబ్రహ్మహి లీలాదాసం
కోనహివేత్తి కపీశ జగత్యతి సంకట మోచన నామ తవేదమ్

(వానర - సింహ - గరుడ - వరాహ -హయ - ముఖములతో పంచానన శివ రూపుడును విష్ణు తిలకము గలవాడును ఈ జగత్తుకు భవిష్యద్బ్రహ్మయు త్రిమూర్తి తత్త్వముతో సాక్షాద్దత్తుడవయ్యును లీలా వినోదముకు దాసుడుగా గోచరించు ఓ హనుమద్దేవా! నిన్ను నమస్కరించుచున్నాను ఓ కపీశ్వరా!...)

హే కనకాంశుక ! కాంచన కుండల వందేత్వాం హనుమంతమనంతం
హేపింగళాక్ష ! సద్గుణ సాగర ! మామవ సతతం మాయామూఢమ్‌
హే మేరుగిరి సముజ్వల విగ్రహ ! పాలయమాం తవ పదయుగలోలం
కోనహివేత్తి కపీశ జగత్యతి సంకట మోచన నామ తవేదమ్

(బంగారు వస్త్రములు ధరించినవాడా! బంగారు కుండలములు కలవాడా! అనంతా! హనుమంతా! నీకు వందనములు. ఓ పింగళాక్షా! ఓ సద్గుణ సాగరా! మాయచేమూఢుడైన నన్ను సదా రక్షించుము. మేరు పర్వతమువలె ప్రకాశించు శరీరము కలవాడా! నీ చరణ ద్వయమునందు ఆసక్తుడైన నన్ను పాలించుము ఓ కపీశ్వరా!...)

సంకటమోచన హనుమద్దేవ మహాస్తుతి మేతాం గాయతి నిత్యం
యోమనుజస్స సమేతి శతాయు ర్బల మారోగ్యం తేజోధైర్యమ్‌
శతశత సంకట జాల మపిక్షణ మేవ వినశ్యతి యాతి సతోషం
కోనహివేత్తి కపీశ జగత్యతి సంకట మోచన నామ తవేదమ్

(ఈ సంకటమోచన హనుమద్దేవతా మహాస్తోత్రమును ఏ మానవులు నిత్యము పాడుదురో వారికి శతాయుర్దాయము, బలము, ఆరోగ్యము, తేజస్సు, ధైర్యము లభించును. వందల కొలది సంకటములు వలగా చుట్టినను ఒక్క క్షణ కాలములో నశించి ఆ మానవులు ఆనందమును పొందుదురు ఓ కపీశ్వరా!...)

Download this bhajan sung by Shri Dattaswami here

అల్లాడెనమ్మా శివుడు - ఇక సతి లేదని

(సతీదేవి అగ్నికి ఆహుతి ఐన వార్త తెలుసుకొని శివుడు తనకిక సతి లేదని అల్లాడిన కీర్తన)
అల్లాడెనమ్మా శివుడు - ఇక సతి లేదని అల్లాడెనమ్మా శివుడు
అల్లాడెనమ్మా తాండవమాడెను శివుడు (పల్లవి)

1. త్రిపధగామిని శిరసుగంగయు - మూడు నేత్రములశ్రుధారలు
చిందించుచుండ చిందులేసెను - హృదయతాపము నోర్వగలేక

2. శాంతి దేవరా ! శాంతి దేవరా ! - అనుచునందియు ప్రమధులు చెప్ప
ఆలకించడు ఆదిదేవుడు - అలమటించుచు అరచి ఏడ్చెను

3. అంగములన్ని అదురుచుండగ - కైలాసమున కాలకంఠుడు
ఏది నా సతి నాసతియనుచు - అందరినడిగి ఎగిరి ఏడ్చెను

4. రాక్షసులైన అడిగిన వెంట - నిచ్చెవరముల కరుణార్ణవుడు
సతినిమ్మనుచు యాచించునదె - కింకరులనట నాట్యమాడుచు

5. నా నిందవిని ప్రాణము విడచె - కలరేయిట్టి భక్తులు జగతి?
నాప్రాణములు పోవవేలనో - అని విలపించె తాండవమందున

6. తూలును ఎగురు మెలికలు దిరుగు - గంతులు వేయు చేతులు ద్రిప్పు
హాహాయనును హాలాహలమె - మింగినవాడె విలవిలలాడె

7. వర్తమానము భావిభూతము - కాలమునందు నిట్టి ప్రేయసి
ఉండబోదని ఘోషించెనట - వేదనాగ్నికి వేగిపోయెను

8. ప్రళయమందున సర్వదహనుడు - ఫాలనేత్రుడే వలవలయేడ్చె
సతీ విరహము తాపమునందు - తాళజాలక తాండవించెను

9. నా నిందకే దహనమైతివి - నేనింకనూ బ్రతికి యుంటిని
నన్నుమించిన కఠినుడుండునె - అనుచు శంకరు డరచియాడెను

10. పింగళ జటల విదిలించునదె - విపరీతముగ గంగ చిందగ
సతీ దహనము నూహించగ - వక్కలై తలపడుట తోచెను

11. నాసతియనుచు కౌగిలించును - శూన్యమందున సతి భావమున
కంపముతోడ నృత్యము జేసె - మంటలబడిన నాగుపాముగ

12. భక్తుల పైన భగవత్ప్రేమ - అపారమగును అందున సతియు
భక్తరత్నము స్వామి హృదయము - తల్లడిల్లెను కల్లోలమై

13. ఉమగా సతియె అవతరించియు - మరల చేరినగాని ముఖమున
మందహాసము పుట్టలేదుగ - శివునికప్పుడె శాంతి వచ్చెను

సతీ దేవి కీర్తన

శివ దత్త కీర్తనలు
(దక్ష ప్రజాపతి కుమార్తె శ్రీ శివ దేవుని రాణి సతీదేవి. తండ్రియగు దక్ష ప్రజాపతి శివుని ఆహ్వానించక శివ రహితమైన యఙ్ఞము తలపెట్టి కుమార్తె సతిని అల్లుడు శివుని ఆహ్వానించలేదు. తన చెల్లెళ్ళు ఆ యఙ్ఞమునకు వెళ్ళుచుండగా జూచిన సతి, భర్తను బ్రతిమాలి శివుడు వద్దన్ననూ వినక స్వామీ అనుఙ్ఞ ఇవ్వండి అని బ్రతిమలి ఆ యజ్ఞమునకు వెళ్ళింది. అక్కడ తండ్రి దక్షుడు శివనిందచేసి ఆమెను అవమానించాడు. భగవంతుడైన శివుని అవమానమును భరించలేక సతీదేవి సతీత్వమును చెందు ఘట్టము.)

సతీ దేవి కీర్తన

1. దక్షాయనుచును ఏకవచనమున - సంబోధించెను తండ్రిని శివసతి
దాక్షాయణియె మొట్టమొదటిగా - స్వామి దూషణము నోర్వగలేకయె

2. ఓరీ! దక్షా ! నోరుమూయుమిక - నా తండ్రిగాన బ్రతికి పోతివిట
వేరొకరైతే నా శాపాగ్నికి - భస్మమయ్యెదరు శివదూషణకై

3. నీకు పుత్రికగ జన్మించుటయే - నేను చేసినది మహాపాపమే
తత్ఫలమిప్పుడు శివదూషణమును - వినవలసెను నేనేల బ్రతుక?

4. స్వామి దూషణము నాకర్ణించియు - బ్రతికి యుంటినే పాపిష్ఠిదాన
కావున పాపికి నీకు పుట్టితిని - మరణించుటయే ప్రాయశ్చిత్తము

5. శివుడన నెవరని తలచుచుంటివో - మూఢాగ్రేసర రాజాధిరాజ !
శివుడే దత్తుడు పరమబ్రహ్మము - త్రిమూర్తులాయన వేషములేగద

6. జగదుత్పత్తిని జగత్పాలనను - జగదంతమునే చేసెడి వాడే
పరమేష్ఠియనగ పురుషోత్తముడన - పరమేశ్వరుడన నతడే దత్తుడు

7. ఓరీ దక్షా ! ఙ్ఞానాంధుండవు - నీ కేమి తెలియు శివమహాత్మ్యము
కరుణరూపుడా పరమేశ్వరుడే - కావున తిట్టియు బ్రతికి యున్నావు

8. శివదూషణమే మహాపాపము - దానిని మించిన పాపము లేదట
దానికి ప్రాయశ్చిత్తము లేదుర - సర్వ పాపహరమగు శివనామము

9. అర్ధము తెలుయునే ? సర్వమంగళుడు - అని శివశబ్దము తాత్పర్యంబని
శివరహితంబగు కర్మయేదైన - అమంగళంబగు నశుభము తుచ్ఛము

10. శ్మశానవాసిని శివునర్చించిన - శ్మశానగమనము తప్పును దక్షా!
అపమృత్యుహరము మృత్యుంజయుడని - తలచుటయని మునిగణములు చెప్పవె

11. దిగంబరుండే కృత్తివాసుడే - పట్టు వస్త్రముల దాల్చనివాడే
కానీతత్పద నతుడు ప్రతిదినము - స్వర్గసంపదల రక్షకునింద్రుడు

12. శివపద ధూళిని శిరమునఁదాల్చును - ప్రతి సూర్యోదయమందున సురపతి
ఆరోజు వరకు అతడికి స్వర్గము - సురక్షితంబగు దక్షా! వినరా !

13. సర్వసంపదల నతడే యిచ్చును - సృష్టి యంతయును అతడి సొత్తే
బిడ్డలు దీనిని భోగించచూచి - సంతుష్టుండగు ఆ మహేశ్వరుడు

14. ఓ పిచ్చి వెధవ ! దరిద్రుడనగా - అమంగళుండన నోరెట్ల వచ్చె
నేత్ర పద్మమును అతడికర్పించి - సర్వ లోకపతి పదవిఁ బొందె హరి

15. శిశుపాలుతిట్లు విని గోపాలుడు - సభలో వక్కల లెక్కించినట్లు
నీ దూషణములు లెక్కపెట్టబడు - మహాకాలుడగు పరమేశునిచే

16. బ్రహ్మయు హరియును యత్నింపలేదె ? కనుగొననీశ్వరు మొదలును తుదినట
హంసవరాహము రూపము లెత్తియు - చేతగాక శివ శరణముఁ జొచ్చిరి

17. వారికె తెలియనసాధ్యుడు శివుడు - నీకేమి తెలియు వాగబోకురా
హరివిధులముందు నీవొక చీమవు - ఆతత్త్వ మెరుగ నీతరమగునే !

18. నీ బోడి యఙ్ఞమెంతర దక్షా ! - యఙ్ఞపురుషుడగు నారాయణుడే
మేరు శైలమున ప్రతి దినమాయనను - పూజించె కమల సహస్రార్చనల

19. నారాయణునే పరీక్షఁ జేసెను - మాయజేసెనొక కమలము నొకపరి
నేత్ర కమలమును పెరికి అర్పించె - ప్రసన్నుడై శివుడెదురుగ నిలచెను

20. కౌగలించె శివుడబ్జలోచనుని - మోహిని భావము నందుచు హరియును
పతిగా తలచెను పరమేశ్వరునే - పురుషోత్తముడే స్త్రీ భావమందె

21. నాటినుండియును సర్వ జగత్పతి - పదవిని మురారి కిచ్చెను భార్యకు
మోహినిరూపము దాల్చి భార్యగా - పురుషోత్తముడే మారెను దక్షా!

22. నీవొక పురుషుడ వైతివీనాడు - పురుషోత్తమునకు పురుషుడగువాని
అల్పుడిగఁ దలచి నాడవు మూర్ఖా ! - నీ అజ్ఞానపు జలధి అపారము

23. శివ నామమును ఉచ్చరింపగనె - శాంతించుమనము పవిత్రతఁ గలుగు
ఒక్కసారి శివ నామము పలుకుచు - అనుభవమందుము మూర్ఖత్వమేల ?

24. మహాప్రళయమున సర్వ జగత్తును - భస్మముఁ జేయును కాలాంతకుడై
సర్వమీశ్వరుని వశముననుండును - విభూతికర్ధము ఇదె భస్మమునకు

25. తాండవగళితము భస్మమును సురలు - సంగ్రహించి తిలకంబు ధరింతురు
శివతనువునుండి రాలినదానిని - చూచి దరిఁజేర భీతుడగు యముడు

26. హాలహలమట జగములదహింప - మగవాడెవడు ముందుకు వచ్చెను ?
పురుషుడొక్కడే పరమేశ్వరుడే - దానిని మింగెను నీలకంఠుడై

27. భస్మమైతిరే నీకు తెలియదా - అట్టహాసమున త్రిపురాసురులే
శరభావతారమెత్తి రుద్రుడే - నరసింహుని శాంతింప చేసెనే

28. ఆదిదేవుడా ! దేవ దేవుడా ! మహాదేవుడా ! నా ప్రాణనాధ !
నా ప్రాణ దీపమారిపోనిమ్ము - నీ నిందవిన్న బ్రతుకు నాకేల ?

29. నా ప్రాణనాధ ! నీ చరణమందు - నా ప్రాణ దీప మారిపోవగా
నాకాభాగ్యము లేదాయెనాధ ! - వీడి కడుపునకు పుట్టినందులకు

30. నీ ప్రేమలోన జీవించియున్న - నిజమైన భక్తురాలనైనచో
నా పాదాంగుళి నిదిగోరుద్దితి - భూమిపై అగ్ని పుట్టిననుగాల్చు

31. అపుడు యోగాగ్ని పుట్టెను దహించె - సతీదేవినే హాహారవములు
మిన్నుముట్టెనే మునిసుర కృతములు - ఎంత భక్తియని అచ్చెరువొందిరి

32. స్వామి దూషణము విన్నమాత్రమున - ప్రాణత్యాగము చేసిన సతినే
మూడుచూపులును ఏకముకాగా - చూచెవిస్మితుడు పరమేశ్వరుడును

33. మూడు నేత్రముల బాష్పధారలే - త్రిమార్గగంగా వాహినిఁ బోలుచు
కురియగ పల్కెను స్వామి 'ఓ ప్రియా-నీ ప్రేమ నెరుగ నాకునసాధ్యము'

భగవద్దూషణ శ్రవణమాత్రమున - ప్రాణము విడచిన సతీమాతరో
సాష్టాంగమిదియె ప్రణతులు తల్లీ ! - మాకిమ్ము నీదు భక్తి లేశమును

Download this bhajan sung by Shri Dattaswami here

జయ జయ రుద్రావతార హే వీరభద్ర నీ కెదురివ్వరిలన్

(సతీదేవి అగ్నికి ఆహుతి కాగా శివ భగవానుడు తాండవము చేసి క్రోధాగ్ని ఉట్టిపడ వీరభద్రుని సృజించి యజ్ఞమును ధ్వంసము చేయనియోగించగా శ్రీ వీరభద్రుని విజృంభణ).
జయ జయ రుద్రావతార హే వీరభద్ర నీ కెదురివ్వరిలన్ (పల్లవి)

1. ఉగ్రుని ఉగ్రమె వీరభద్రునిగ ఆకృతి దాల్చగ నృత్యములో
రంకెలు వేయుచు గంతుల నెగురుచు ఖడ్గము త్రిప్పుచు హస్తముతో
బయటకు వచ్చెను పింగళజటలవె ప్రళయాగ్ని శిఖలు తోచెడిగా
జయ జయ రుద్రావతార హే వీరభద్ర! నీ కెదురివ్వరిలన్

2. ప్రళయపయోధర కులములు నొకపరిచేరుచు నురిమిన శబ్దముతో
పటుతర గర్జనలోప్పగ 'దక్ష పిపీలికమా! ఎటనుంటివిరా ' ?
అనుచుచు కేకల వేయుచు గగన పధంబున ప్రస్థితుడైతివిగా
జయ జయ రుద్రావతార హే వీరభద్ర! నీ కెదురివ్వరిలన్

3. పదపద ఘాతమునందున మేఘము లెగురగ నక్షత్రంబులవే
ధూళి కణంబులుగా పైకెగురుచు తారాథూమములుప్పతిలన్
భగ భగ మండెడి విస్ఫులింగములు కన్నుల వర్షముగా కురియన్
జయ జయ రుద్రావతార హే వీరభద్ర! నీ కెదురివ్వరిలన్

4. నిను తిలకించిన దేవగణంబులు మునులును పరుగులు తీసిరిగా
అదియె మహా ప్రళయంబదె వచ్చె నటంచుచు కేకలతో దిశలన్
మెలిదిరిగిన మీసములె కత్తులుగా ముఖమందున భీకరముల్
జయ జయ రుద్రావతార హే వీరభద్ర! నీ కెదురివ్వరిలన్

5. ఋషులను సురలను పాదఘాతములఁ దన్నుచు వచ్చిన పాపముకై
శివరహితంబగు క్రతువును చేయగ ఎంత పొగరనుచు గర్జనతో
క్రతువున వెలిగెడి అగ్ని గుండమున ఉమ్మి వేసియట నార్పితివే
జయ జయ రుద్రావతార హే వీరభద్ర! నీ కెదురివ్వరిలన్

6. దక్షుని శిరమును తెంచితివచ్చట ఖడ్గముతో నావేశముతో
ఛీ ఛీ తుచ్ఛాయని గాండ్రించుచు వ్యాఘ్రమురీతిగ దూకులతో
ఉగ్ర విహారము చేయగ బ్రహ్మయు, హరియు నుతింప నిలచితివే
జయ జయ రుద్రావతార హే వీరభద్ర! నీ కెదురివ్వరిలన్

7. హే! కరుణార్ణవ ! దక్షుని జీవము నిచ్చితివప్పుడు శాంతుడవై
విధి హరి యాచన మన్నించితివే దయతో నీ పదమందు పడన్
మేషముఖుండగు దక్షుడు నిన్ను నుతించగ వీరేశ్వర శరభా !
జయ జయ రుద్రావతార హే వీరభద్ర! నీ కెదురివ్వరిలన్

8. హే! కరిమర్దన ! హే క్రతుఖండన ! హే విషకంధర! నందిపతే
హే! శశిశేఖర! హే ఫణిభూషణ ! హే కాలాంతక! స్కందగురో
హే ! వీరేశ్వర ! హే పరమేశ్వర ! హే లయ తాండవ ! ప్రమధపతే!
త్వాం ప్రణమామి మహేశ్వర ! శంకర ! పాలయ కింకర మీశ్వరమామ్‌

9. వీరంభజే - వీరభద్రం భజే - రౌద్ర వికటాట్టహాసంభజే
కాళీపతే - భద్రకాళీపతే - రౌద్ర వికటాట్టహసంభజే
శ్రీ భద్రకాళీ సహితం వీరభద్రం నమామ్యహమ్
కులదేవం ప్రసూతాత రూపాన్తర మివస్ధితమ్‌

శివ కీర్తనలు - 2

(శివదత్తుడు పార్వతీ దేవి దీక్షను పరీక్షించి, అనుగ్రహించి పార్వతీ కళ్యాణమునకు వెడలిన ఘట్టము).

కదలి వచ్చినాడె కళ్యాణమునకు
సుందరేశ్వరుడు సొగసుల రాయుడు కదలి వచ్చినాడె (పల్లవి)

1. జటాజూటమే కనక కిరీటము - చంద్రరేఖయే ముత్యాలసరము
ఫాలనేత్రమే అరుణతిలకమై - సంకల్పించగ వేషము మారెను

2. ఉరగములయ్యెను స్వర్ణహారములు - పడగల మణులవి మార్పును చెందక
తనువున తెల్లని భస్మము మారెను - సుగంధ కరమౌ అంగరాగముగ

3. గజాజినమయ్యె పట్టు వస్త్రముగ - గంగాధారయె మల్లెలమాలగ
చరణోరగములు మణినూపురములు - కంఠ నైల్యమే కలువపూవుగ

4. ప్రమధగణంబులు రాజవేషముల - మేళములూదుచు వాద్యనాదముల
బయలుదేరగా బయలుదేరెనే - పెండ్లి కొడుకై పరమేశ్వరుడు

5. మదవృషభంబదె నందీశ్వరుడు - సాలంకృతుడై చిరుమువ్వలతో
స్వామిని మోయుచు సుందరగతితో- ఝలఝల ఝలఝల రవముల నడచెను

6. వేదమంత్రముల చదువుచుముందుగ - వాణితో నడచె బ్రహ్మ దేవుడట
పద్మ గోవిందులిరుపక్కలలో - నడచిరి నవ్వుల కళకళలాడుచు

7. వాణి రచించిన మంగళ గీతుల - మధుర కంఠమున పద్మ పాడినది
మురహరుడంతట మురళినూదెను - తలనాడించెను స్మితముఖుడీశుడు

8. ముక్కోటి సురలు ముందుగ పక్కల - వెనుకను నడచిరి శంఖములూదుచు
స్వస్తి వాచనము లొప్పగ చెప్పుచు - సప్త మహర్షులు సరసనె నడచిరి

9. గంధర్వగణము గళమెత్తిపాడె - జయజయ శంభో జయశంభో! యని
కిన్నరు లందరు వీణల మీటిరి - అప్సరసలంత నృత్యమునాడిరి
Download this bhajan sung by Shri Dattaswami here
-------------
(త్రిపుర సుందరి యైన పార్వతిని వాణి, పద్మలు దేవకాంతలే సువాసినులుగా అలంకరిచిన ఘట్టము).

గౌరీ కళ్యాణ వైభవమే దేవ కాంతలే సువాసినులే (పల్లవి)

1. ఉత్తర తారను చంద్రుడుండగ - సింహలగ్నమున పార్వతి పెండ్లి
బంగారు బొమ్మ గౌరిని వధువుగ - చేయుచుండిరదె సువాసినులార!

2. గంగయె స్వయముగ తరలివచ్చెనే - మంగళస్నాన విధినొనరించగ
ఆస్నాన నెపముతోడ గంగక్క - కౌగలించెనే ముద్దుల చెల్లిని

3. పసుపును కలిపిన సున్నిపిండినే - నలుగును పెట్టగ వచ్చిరి స్వయముగ
వాణియు లక్ష్మియు విసిరివేసిరే - దానిని గౌరీ తను కాంతిఁజూచి

4. పన్నీరుఁజల్ల పరుగున వచ్చిరి - దేవకాంతలట పార్వతి మీదను
గౌరితనువున పద్మగంధమదె - సహజముగరాగ విరమించిరదియు

5. బంగారురంగు ఎర్రని అంచుల- పట్టు చీరెనే శివుని కిష్టమని
ధరింపఁజేసిరి బంగారు కాంతి - దేహమందునది కలిసిపోయెనే

6. బంగారు సొమ్ములన్నియు పెట్టిరి - గౌరికితనువున వెలవెల బోయెను
అగ్నిలో కాలి మరింత మెరుపున - వచ్చిన తనువది పూర్వజన్మఁ బడి

7. పూలహారములు నంగములందున - శోభిల్లు చుండ వనదేవతలా
పద్మవేసినది పద్మహారమును - కోత్త శోభతో వెలుగుచుండెనది

8. మొగలి పూవులే రేకుల ముడిచి - గులాబిపూవుల తురుముచు కట్టిన
పూలమాలతో మేళవించిరే - పెండ్లి కూతురికి జడనువేసిరే

9. కళ్యాణతిలకమప్పుడు దిద్దిరి - గౌరి ఫాలమున పద్మయు వాణియు
అరుంధతి పెట్టె కన్నులకాటుక - కాటుక చుక్కను బుగ్గపై చివర

10. హంసయానమున బయలుదేరెనే - మేళతాళములు మిన్నుముట్టగా
బంగారు గాజులవె కదులుచుండ - పదములనందెలు ఘల్లు ఘల్లుమన

11. పారాణి పాద పద్మములవియే - జగదంబవియట కదులుచున్నవే
అడుగు అడుగునకు కొత్త అందములు - అప్సరసలెమరి మురిసిపోయిరే

12. వాణియు పద్మయు కౌగిలించిరే - మోహభావమున తాళజాలకే
త్రిపురసుందరియె పెండ్లి కూతురై - సొగసుల దేవత నడుచుచున్నదే

13. కండ్లుమూసుకొని తపమును చేయును - శివుడెందులకో ఇపుడర్ధమాయె
అందాలరాశి నీ గౌరమ్మను - పొందుటకేలే అన హరి నవ్విరి

14. తత్తరలాడెను శివుని నేత్రములు - గౌరినిఁ జూడగ బ్రహ్మ మంత్రముల
నాలుగు ముఖముల నొకసారిచదువ - వేరువేరుగా బాగుండుననుకొనె

15. ముక్కోటి దేవత లొక్క దృష్టితో - చూచుచుండిరే కన్నులు చెమరింప
మంగళ సూత్రము కట్టునమ్మా - గౌరికి మెడలో శంకరుడు

16. భగవంతుడే వరుండనగా - భక్త జీవుడె పెండ్లి కూతురు
మంగళసూత్రమె భక్తి బంధము - అంతరార్ధమును తెలియండీ

17. భరించువాడే భర్తయగును - సర్వ భర్తయె పరమాత్మ
భరింపబడె జీవుడు భార్య - సహస్రార బంధమె కళ్యాణము

18. శివాయ మంగళం - సర్వ మంగళం - సర్వ మంగళా ధవాయ మంగళం
భవాయ మంగళం - దత్త మంగళం - అనఘా ప్రియాయ నిత్య మంగళం
Download this bhajan sung by Shri Dattaswami here
-----------------------
(సతీదేవి హిమవంతునకు పార్వతి నామధేయముతో జన్మించి, శివుని వరించి తపము చేయుచున్నప్పుడు శివదేవుడు కుహనావటువు రూపంలో వచ్చి ఆమె దీక్షను పరీక్షించుట).
గౌరి పరీక్షకు బ్రహ్మచారిగా వచ్చుచున్నా డు వామదేవుడు (పల్లవి)

సుందర తాపస తరుణ వేషమున - బ్రహ్మతేజమే ప్రజ్వరిల్లగా
కరముల దండ కమండలు ధారిగ- పండితోత్తముడు హుటాహుటి నడచి

చరణ పాదుకలు ధ్వనులను చేయగ - బ్రహ్మ వర్చస్సు ముఖమున చిందగ
తేజోమయ ననయంబుల చూచుచు - సన్న నవ్వు అధరంబున వెలయగ

విభూతి రేఖలు మధ్య కుంకుమము - ఎర్ర కాశ్మీర శాలువ భుజముల
వేదమంత్రముల తియ్యగ పలుకుచు - బ్రాహ్మణ నైష్ఠిక గాంభీర్యముతో

శివ కీర్తనలు - 1

(ఉపమన్యువను పసిబాలుని అనుగ్రహించి పాల సముద్రమును ఒసంగిన కీర్తన )
చంద్రశేఖరా దయాసాగరా
వామదేవా! నిను వర్ణించగలనా ? (పల్లవి)

1. ఉపమన్యువనెడి తాపసబాలుడు - పాలు లేక విలపించె నాశ్రమమున
దిక్కుతోచని తల్లి పలికెను - సర్వేశ్వరునే అడుగు పొమ్మని

2. అంతట బాలుడు బయలుదేరెను - దుర్గమారణ్య మార్గమందున
నాన్నా! శంకర! పాలనీయవా! - అన్న వాక్యమే మంత్రమాయెను

3. ప్రళయ భయంకరుడైనను నీవు - కరిగిపోతివి కరుణార్ణవమా
యుగయుగ తపముల కందనివాడవు - క్షణమున ఎదురుగ నిలిచినావు

4. ఫాలనేత్రము నుండియు కురిసెను - వేడి వేడి కన్నీటి ధారలు
పాలబుగ్గల పసివానిఁ జూసి - నాన్నా రమ్మని కౌగలించితివి

5. తొడను కూర్చుండ పెట్టుకొంటివి - చేతిలోనికే పరుగున వచ్చెను
పాలసముద్రమె బాలున కీయగ - నీ కరుణఁ జూచి అసురులె ఏడ్చిరి

Download this bhajan sung by Shri Dattaswami here
--------------------
(పార్ధునికి పాశు పతాస్త్రము అనుగ్రహించిన కీర్తన.)
బయలుదేరినాడే - బోయవేషముల
పార్ధునితోడ యుద్ధముచేయగా
పార్వతితో పరమేశ్వరుడు (పల్లవి)

1. కైలాసము వీడి కదలివచ్చినాడే - కలకలనవ్వెడి కలికి వెంటరాగ
మందాకిని తట మందగమనమున - మందహాసమున భక్త మందారుడు

2. అడుగులు వేయుచు గంభీరముగా - ఎర్రని జటలవె ఎగురుచుండగా
చేతుల నూపుచు వీరాధి వీరుడు - మృగములరాజగు సింహము రీతిగ

3. శిరసు చంద్రకళ పక్షి యీకెగను - ఫాలనయనమె కుంకుమ బొట్టుగ
ఉరగ భూషణములు పూసలదండలు - మారిపోవ శివ కోయరాజతడు

4. ఆదిదేవుని అడుగుల బాటను - హిమగిరి వనమదె అప్పటికప్పుడె
పుష్పములరాల్చి పూలబాటగా - అర్చించెనట అనఘా ప్రియుని

5. అతిధీరముగా అతి విలాసముగా - వామదేవుని నడకల సొగసులు
తనివితీరగా ఆలోకించిరి - ఆకాశమందు అప్సరసలట

6. అనవసరముగా రెచ్చగొట్టియు - ఓడించిమరల గెలిపించి నరుని
అనుగ్రహించెనదె పాశుపతమిచ్చి - అపార కరుణా సాగరుడతడే

Download this bhajan sung by Shri Dattaswami here

--------------------
కింకరోஉస్మి తవ శంకర ! నూనం
భక్తవ శంకర ! పాహి పాహి శివ ! (పల్లవి)

1. హిమాంశురేఖా ముక్తావళీవ - జాటజూట మకుటోపరి భాతి
ఉష్ణీవస్త్ర శేషవదేషా - ధవళా తరళా గంగాధారా

2. మణి దీధితి మత్కాల సర్పకుల - మిన్ద్ర నీలమణి హారచయఃకిమ్‌ ?
లలాటనయనం వహ్నిభిరరుణం - విభూతి రేఖా కుంకుమబింబమ్‌

3. పినాక పాణే! పాశుపతాస్త్రం - పార్ధాయ దిశసి పరమోదార !
మునిశిశవేత్వం క్షీరాబ్ధిమేవ - గౌరీమేవచ దశకణ్ఠాయ
Download this bhajan sung by Shri Dattaswami here

------------------
అన్నపూర్ణతో ఆసినుడైన - ఆదిదేవుడా! ఆలకించవా
నన్నేలుమింక నారాయణ ప్రియ! - నాకెవరు దిక్కు నాగేంద్ర హార! (పల్లవి)

1. వారణాసిలో విశాలాక్షితో - వేదపీఠమున వెలిగేటి దేవ!
జీవ భక్తులకు మాయలముడులను - తలి విప్పగా మోక్షమిచ్చేవు

2. గంగలో మునుగ ముక్తులయ్యేరు - బ్రహ్మ ఙ్ఞానమె గంగానది యన
జలములమునిగెడి పశువులఁజూచెడి - మందస్మితముఖ ! పశుపతినాధ !

3. ఙ్ఞానమె తేజము కాశి అర్ధమదె - ఙ్ఞానప్రాప్తియె కాశీగమనము
భక్త్యావేశమె గంగా స్నానము - పరమార్ధ దత్త ! పరమేశ వేష !

4. సర్వపాపహర ఈ భక్తి గంగ - నీ కరుణ హిమమై ప్రవహించెనదిగ
అంతరార్ధమున పశుపతిని పొందు - బాహ్యార్ధమైన పశుజన్మ పొందు

Download this bhajan sung by Shri Dattaswami here

శఙ్కరాయతే - లోక - శఙ్కరాయతే

(శ్రీ వాసుదేవుడు తన వేణువుపై ఈ గీతమున శంకరుని స్తుతించినాడట.)
శఙ్కరాయతే - లోక - శఙ్కరాయతే
వన్దనానిమే - దేవ - వాసుదేవస్య (పల్లవి)

ఫాలలోచనం - తవహి - మే సుదర్శనం
శూలమేవ తే - తిలక - మూర్ధ్వ పుండ్రకం
నీల కంఠ ! తే - భాతి - కంఠ నీలిమ
విస్తరాన్మహో - మమహి - దేహ నీలిమ

ఫాల చక్షుషా - దగ్ధ - పద్మసాయకం
సాదరాక్షిణా - దృష్ట - పద్మ సంభవం
ప్రేమ వీక్షణా - లోల - పద్మలోచనం
త్వాం త్రిలోచనం - దేవ - సంస్మరామ్యహమ్‌

నటన పణ్డిత ! - స్ఫురతి రమ్యతాణ్డవమ్‌
చిత్రమణ్డలం - భ్రమణ లోల కుణ్డలమ్‌
ఉరగ మణ్డన ! - స్ఖలిత ధర్మదణ్డనమ్‌
దనుజ ఖణ్డనం - విజిత భారతీ భణ్డనమ్‌

Download this bhajan sung by Shri Dattaswami here

ఓం నమః శివాయ ఓం నమః శివాయ

(శివ పంచాక్షరీ మహిమ వర్ణనము.)
ఓం నమః శివాయ ఓం నమః శివాయ
పంచాక్షరి యిది పరమ పావనము (పల్లవి)

1. పంచభూతములపై ఆధిపత్యమును - ప్రసాదించగల మహామంత్రము
సుందర కవితా చాతుర్యరీతి - ననుగ్రహించెడి మహా మంత్రము

2. వేదాంత జలధి మధనామృతమగు - ఙ్ఞానమునిచ్చెడి మహామంత్రము
సర్వ విక్షోభ ప్రశమన కరమై - మనశ్శాంతినిడు మహామంత్రము

3. అష్టసిద్ధులను అవలీలగాజేయు - శక్తినిచ్చెడి మహామంత్రము
చక్రాలదాటి సహస్రారమున - శివునిఁ జేర్చెడి మహామంత్రము

4. ఆదిదేవుని అంఘ్రి పద్మముల - భక్తి నొసగెడి మహామంత్రము
నిష్టానిశ్చల యమనియమాసన - ధ్యానయోగకర మహామంత్రము

5. సంసారవాసనా విషయధ్వంసక - కామదహనమీ మహామంత్రము
అనన్యమద్భుత వైరాగ్యమిచ్చు - సర్వ పాపహర మహామంత్రము

Download this bhajan sung by Shri Dattaswami here

శివుని లింగము - భవుని లింగము

శివుని లింగము - భవుని లింగము
హరుని లింగము - ఆత్మలింగము
అదిగో చూడుడు - అనుభవించుడు
అమర దుర్లభా - నంద ముక్తిని (పల్లవి)

1. సృష్టిపాలన ప్రళయమూలము - ఆదిదేవుని ఆత్మలింగము
అద్భుతంబగు శుద్ధతేజము - దేవదేవుని ఆత్మలింగము

2. ఆ మృకండుజ ప్రాణదానము - అమరనాధుని ఆత్మలింగము
మృత్యుదేవుని ప్రాణఘాతము - కాలకాలుని ఆత్మలింగము

3. చంద్రరేఖను కల్గినట్టిది - పార్వతీపతి ఆత్మలింగము
మూడు అడ్డపు భస్మరేఖల - నీలకంఠుని ఆత్మలింగము

4. గంగ జలముల సదభిషిక్తము - గరళ కంఠుని ఆత్మలింగము
మధ్య కుంకుమ భ్రాజమానము - వామదేవుని ఆత్మలింగము

5. సృష్టి చేయగ ప్రధమకామము - సుందరేశ్వరు ఆత్మలింగము
శక్తి రూపము సత్తరంగము - సంగమేశ్వరు ఆత్మలింగము

6. వేద జలధుల మధన దక్షము- కాశికాపతి ఆత్మలింగము
ఖలులఁ ద్రుంచును సురల బ్రోచును - కాల భైరవు ఆత్మలింగము

7. కామదేవుని కాల్చివేసిన - సోమనాధుని ఆత్మలింగము
ఆ గజాసురు కుక్షిజీల్చిన - భీమశంకరు ఆత్మలింగము

8. కాలపాశము నడ్డుపెట్టిన - మహాకాలుని ఆత్మలింగము
సాయమందున నాట్యమాడెడి - నాగేశ్వరుని ఆత్మలింగము

9. అర్ధరాత్రిని ఉద్భవించెడి - శ్రీ గిరీశ్వరు ఆత్మలింగము
అన్ని అఘముల కాల్చివేసెడి - రామేశ్వరుని ఆత్మలింగము

10. భ్రాంతినంతయు రూపుమాపెడి - వైద్యనాధుని ఆత్మలింగము
త్రికరణార్పణ సేవ్యమానము - త్రియంబకేశు ఆత్మలింగము

11. కేళితాండవా నంద లోలము - కేదారపతి ఆత్మలింగము
కృష్ణుడెప్పుడు పూజఁ జేసెడి - ఘృష్ణీశ్వరుని ఆత్మలింగము

12. పాశుపతమును పార్ధునకొసగు - పరమేశ్వరుని ఆత్మలింగము
తిన్నడొసగిన కన్ను గలిగిన - వ్యోమకేశుని ఆత్మలింగము

13. పాలధారల స్నానమాడెడి - పశుపతీశుని ఆత్మలింగము
పెరుగు ముద్దలు జాలువారెడి - శర్వదేవుని ఆత్మలింగము

14. గోఘృతంబుల తడిసినట్టిది - గోకర్ణపతి ఆత్మలింగము
ఫలరసంబుల తీర్ధమాడిన - చంద్రశేఖరు ఆత్మలింగము

15. మహిషవాహుని మట్టుఁబెట్టిన - కాళికాపతి ఆత్మలింగము
నారసింహుని నిలువరించిన - శరభేశ్వరుని ఆత్మలింగము

16. దక్షశిరమును తుంచివేసిన - వీరేశ్వరుని ఆత్మలింగము
త్రిపురాసురుల మట్టి కలిపిన - త్రిలోక శాసి ఆత్మలింగము

17. ఆంజనేయుడు మోసితెచ్చిన - కైలాసపతి ఆత్మలింగము
గణేశుడెత్తి జార విడిచిన - నందివాహుని ఆత్మలింగము

18. క్షీరజలధిని శిసువుకొసగిన - స్కందజనకుని ఆత్మలింగము
హాలహలమునె ఆరగించిన - కాలకంఠుని ఆత్మలింగము

19. గౌరి తపమును పరీక్షఁ జేయు - హాటకేశ్వరు ఆత్మలింగము
ప్రమధ గణముల నృత్యలోలము - వృషభేశ్వరుని ఆత్మలింగము

20. నాదసాగర గాన మోదము - వేదవేద్యుని ఆత్మలింగము
తాండవంబున చిందులేసెడి - చిన్మయేశుని ఆత్మలింగము

21. స్వప్రాకాశము స్ఫటిక విమలము - తారకేశుని ఆత్మలింగము
మెరుపుచుక్కల రసోజ్వలమగు - పావకాక్షుని ఆత్మలింగము

22. ఙ్ఞాన నేత్రపు కంటి పాపయె - పరాత్పరుని ఆత్మలింగము
పంచాక్షరిని పలుకఁ జేసెడి - పంచాననుని ఆత్మలింగము

23. గొల్లభామకు వెనుక నడచిన - కోటీశ్వరుని ఆత్మలింగము
భక్తుల కర్మ ముడులు విప్పెడి - విశ్వేశ్వరుని ఆత్మలింగము

24. విశ్వమంతయు నాక్రమించిన - స్వయంభు విభుని ఆత్మలింగము
అష్టసిద్ధుల నతిశయించెడి - ఓంకార శివు 'ఆత్మలింగము'

25. అష్టదరిద్ర మంతము జేయు - అగ్నిలోచను ఆత్మలింగము
అష్టసిరులను అందించెడిది - హిరణ్యేశ్వరుని ఆత్మలింగము

26. ఆరోగ్యకర మాయుష్కరము - అమరేశ్వరుని ఆత్మలింగము
భయమును బాపి ధైర్యమునిచ్చు - వజ్రేశ్వరుని ఆత్మలింగము

27. పాండిత్యమును ప్రసాదించెడి - నాసికేశ్వరు ఆత్మలింగము
కవితాశక్తి ధారనిచ్చెడి - కాలాంతకుని ఆత్మలింగము

28. సంతానమును సుఖమునిచ్చెడి - గణేశ గురుని ఆత్మలింగము
అపమృత్యువును ఆపివేసెడి - కాలాంతకుని ఆత్మలింగము

29. అర్జున రధము ముందు నడచెడి - విజయేశ్వరుని ఆత్మలింగము
శిబి పరీక్షను చేసినట్టిది - కపోతేశ్వరు ఆత్మలింగము

30. వ్యాఘ్రమునెక్కి మహిషిఁజంపిన - మణికంఠ గురు ఆత్మలింగము
విషయవిషమును విరుగుడుఁజేయు - శేషహారుని ఆత్మలింగము

31. అద్వైతమత భాష్య వాదము - ఆది శంకరు ఆత్మలింగము
మండనమిశ్రు నోడించినది - వ్యుప్తకేశుని ఆత్మలింగము

32. సర్వఙ్ఞ పీఠమెక్కి వెలిగిన - శృంగ గిరీశు ఆత్మలింగము
దత్తగురువే కౌగిలించిన - కేరళ శివుని ఆత్మలింగము

33. దత్త శివునికి హృదయమందున - సృష్టి చేయగ మొదట పుట్టిన
సంకల్పమగు శక్తి వీచియె - అనఘాకృతియే ఆత్మలింగము

Download this bhajan sung by Shri Dattaswami here