మూడునామాల మెరిసేటి మొనగాడా

మూడునామాల మెరిసేటి మొనగాడా !
మూడుమూర్తులకు మూలమైనట్టి వాడా ! (పల్లవి)

1. భక్తి మద్యము త్రాగు ఉన్మత్తుడా! - ధర్మాల తన్నేటి శ్రీ దత్తుడా!
గోపికలతో గూడు శ్రీ కృష్ణుడా ! - నీ లీలలె శ్రీ వెంకటేశుడా !

2. పద్మకై ప్రతి రాత్రి దిగివచ్చేవు - భక్తి ప్రభావమదియని చాటేవు
స్వార్ధములఁ దీర్చుకొన గిరినెక్కేరు - వారికి శిలా మూర్తి కనిపించేను

3. భక్తులకు చేతనగ, మాటలాడేవు - స్వార్ధులకు శిలగానె గోచరించేవు
పాషాణ విగ్రహమె స్వార్ధ జీవులకు - కరుణా రసార్ణవము భక్త జీవులకు

4. కోరికలు దీర్చుకొనవచ్చు లుబ్ధులకు - మాటలాడిన గాని మౌనమిచ్చేవు
మాటలాడగ నీవె స్వయముగా కొండ - దిగి వత్తువా ! స్వార్ధ రహిత భక్తులకు

5. పద్మావతీ ప్రేమ ఎంత గాఢమో - తెలియంగ తరమౌనె దేవతలకైన
కాలినడకనె వచ్చు కొండరాళ్ళలో - ప్రతి రాత్రి పాదముల బొబ్బలెక్కగా

6. లుబ్ధులకు పగలంత రాతి పాదములు - కఠినంబులైయుండు మార్పులేకయె
అర్ధరాత్రులవియే మారు పద్మకై - చరణ పద్మములుగా కోమలంబులై

Download this bhajan sung by Shri Dattaswami here.