గోపి గీతలు - 2

స్వామి రచించిన గోపి గీతలు గ్రంధము నిండి కొన్ని భజనలు.
----------------------------------
గొల్లభామా ! గొల్లభామా ! - ఏమి యిచ్చి ఋణముఁ దీర్తు (పల్లవి)

పతిని సుతుల కాలఁదన్ని - పరుగు తోడ దూకినావె
అత్త మామలెదురు నిలువ -త్రోసిపుచ్చి వచ్చినావె
సత్యలోక మిత్తునన్న - కాలిగోటి సాటిరాదు
నీదుపాద పద్మయుగము - హృదయమందు నుంచుకొందు

యమున వద్ద వలువలన్ని - దొంగిలిచ చేతులెత్తి
అణువు అణువు నేవె అనుచు - మ్రొక్కినట్టి ముద్దులాడి
మనముఁ గొట్టు మన్మధుండు - బ్రతుకఁ జాల ధరణి నింక
కాలిఁ గొట్టు బోయవాడు - వాలిసుతుడు రాడదేల

రుక్మిణమ్మ వట్టి బొమ్మ - చుప్పనాతి సత్యభామ
రాధ ఎపుడు ఏడ్చు గంగ - వలపు నీదె గొల్లభామ
రాకు రాకు గొల్లభామ ! - వత్తువేని పోకు పోకు
రాని యెడల విరహ బాధ - వచ్చిపోవ ప్రాణమెగురు

గొల్లభామ గొల్లభామ - నామ జపమె ధ్యానమయ్యె
కనుల నీరు జలధులయ్యె - విషము నైన నిచ్చి పొమ్ము
ద్వారనగర జలధి చేరు - బృంద యమున గిరుల దాటి
అటుల నీవు అడ్డులన్ని - దూకిరమ్ము నన్ను చేర

-----------------------------
(దేవతలు ఋషులు గోపికను స్తుతించు భజన)

చదువురాని చందమామ ! వేద ఋషివి నీవె గోపి ! (పల్లవి)

1. చదువులన్ని చదివి చదివి - చదువు లోని సారమెరిగి
చదువులేని జన్మ నెత్తి - మార్గమైన గొల్లభామ
హరినిఁ బట్ట విద్యలెన్నొ - నేర్చి విర్రవీగినాము
ప్రేమ విద్యతోడ హరిని - పాదదాసుఁ జేసినావు

2. తపములెన్నో చేసినాము - స్వామి చూపుకూడ లేదు
తపమనంగ ప్రేమయనుచు - తెలిపినావు ప్రణతులివియే
యుగతపములఁ జేసినాము - స్వామి చూపుకూడ లేదు
ఎంతదానివమ్మ నీవు - నీదు విరహ మందు వేగు

3. నెమలికన్ను వాడిపోయె - మురళి నూద మాడిపోయె
చందనంబు రాలిపోయె - కనులు రెండు వాలిపోయె
వేడి హెచ్చె నాడితగ్గె - దేహమంత కాలుచుండ
తిలకమంత కారిపోయె - తులసిమాల తుంపులయ్యె
శ్రావణమున కృష్ణ మేఘ - కరుణ వృష్టి రయముతోడ
ఎన్ని అడ్డులున్న దాటి - జలధి శయనుఁ జేరవమ్మ

------------------------
(బృందలో నున్న గోపి, ద్వారకలో నున్న స్వామికి పంపిన సందేశము)

శ్రావణాభ్ర మేఘమాల ! చెప్పిరావె నీవయినా (పల్లవి)

1. మదిని కొల్ల గొట్టి పోయె - మనోహరుడు ఏడివాడు ?
కానరాక మురళినూది - పులబాణ మేయువాడు
ఏల ఉండు నమ్మరేడు? - మత్తులోన ముంచినాడు
ప్రాణములివె పోవుచుండె - దోచుకొనెనె దొంగవాడు

2. మాయతోడ మాయగెలుపు - మంటు మాయ చేసినాడు
మనసుదోచు కొనుట తెలుసు - మనసు తెలుసు కొనగలేడు
విశ్వమంత నిండియున్న - విష్ణుదత్త కృష్ణుడతడు
నిలువనీడు నీలమేఘ - శ్యాముడైన కొంటెవాడు